"Ekkert nýtt að forsetakosningar verði persónulegar"

Stefanía Óskarsdóttir, stjórnmálafræðingur, var gestur í útvarpsþættinum Reykjavík síðdegis á Bylgjunni í dag. Hún ræddi þar við þáttastjórnendur um forsetakosningarnar og var spurð áleitinna spurninga um hvort að aukin harka hafi færst í kosningabaráttuna.

„Ef við lítum til baka yfir söguna, þá er það auðvitað ekkert nýtt að kosningar sem snúast um persónur verði oft persónulegar," segir Stefanía.

Hún segir að það sé í raun eðlilegt að harka færist í kosningabaráttuna nú þegar rúm vika er í kosningar. „Margir hafa haft það að orði að baráttan hafi í raun verið dauf hingað til. Þetta hefur hreinlega farið framhjá mörgum, misst af spjallþáttunum og annað."

Stefanía telur að neikvæðar sögur úr fortíð frambjóðenda hafi lítið vægi í hugum kjósenda. „Nú þegar hafi margir gert upp hug sinn en ég held að kjósendum lítist almennt nokkuð vel á frambjóðendurna.“

Hægt er að hlusta á ítarlegt viðtal við Stefaníu hér fyrir ofan.