Tveggja ára fangelsi fyrir að verða barni sínu að bana

Agné Krataviciuté, var dæmd í tveggja ára fangelsi fyrir að hafa orðið nýfæddu sveinbarni sínu að bana í júlí á síðasta ári, veita því skurðáverka í andliti og koma líkama þess fyrir í ruslageymslu Hótel Frón, þar sem Agné starfaði við þrif. Dómari kvað upp úrskurð nú fyrir stundu í Héraðsdómi Reykjavíkur.

Hún neitaði alfarið sök við aðalmeðferð málsins og kannaðist ekki við að hafa eignast barn yfirhöfuð. Hún var metin sakhæf af geðlæknum.Farið var fram á 16 ára fangelsi yfir Agné.

Hún var hinsvegar sýknuð af manndrápi og dæmd fyrir grein hegningarlaganna númer 212 sem hljóðar svo:

„Ef móðir deyðir barn sitt í fæðingunni eða undir eins og það er fætt, og ætla má, að hún hafi gert það vegna neyðar, ótta um hneisu eða sökum veiklaðs eða ruglaðs hugarástands, sem hún hefur komist í við fæðinguna, þá varðar það fangelsi allt að 6 árum.“

Agné er einnig gert að greiða barnsföður sínum 600 þúsund krónur í miskabætur. Gæsluvarðhald dregst frá refsingunni.