Vilborg Arna pólfari segist hafa lent í ýmsum erfiðum aðstæðum á þeim tveimur vikum sem hún hefur skíðað á Suðurskautslandinu. Allt hafi hins vegar gengið vel og vonast hún til að vera komin á Suðurpólinn innan fjörutíu daga.

Vilborg Arna Gissurardóttir er komin 180 kílómetra áleiðis í átt að Suðurpólnum en samtals mun hún ferðast yfir ellefu hundruð kílómetra og segir hún ferðalagið hingað til hafa gengið vel.

„Maður gengur ekki alveg beina leið heldur þarf maður að krækja fyrir sprungur og það eru brekkur, hækkun og svoleiðis. En ég er komin yfir erfiðustu hjallana hvað það varðar," segir hún.

Hún hefur núna gengið að meðaltali um 17 kílómetra á dag en þarf að koma sér upp í yfir tuttugu kílómetra á næstu dögum til að halda áætlun en ýmislegt getur komið uppá við þessar aðstæður.

„Ég hef ekki lent í lífshættu eða þannig en ég hef lent í erfiðum aðstæðum eins og að fara yfir sprungur og leita að leiðum til að komast yfir sprungurnar af því maður getur ekki alltaf farið beinustu leið heldur þarf að finna tryggar snjóbrýr og þess háttar til að komast yfir. Ég þurfti að gera það í upphafi ferðar og það gat verið krefjandi."

Þá hefur hún þurft að glíma við mikinn kulda og vindasamt veður undanfarna daga og um daginn brotnaði ein af tjaldsúlum hennar svo það tók hana mjög langan tíma að tjalda tjaldinu úti í fimbulkulda.

„Það er ekki hættulegt í sjálfu sér en maður þarf að vera rólegur og klára að gera við og svoleiðis. Manni verður kalt á meðan en þeim mun betra að komast í tjaldið á eftir."

Vilborg gengur til styrktar kvennadeild Landspítalans en hægt er að fylgjast með ferðinni og heita á hana á heimasíðunni lifsspor.is og hvetur hún fólk til þess.