Hildur Lilliendahl fékk aðdáandabréf

Hildur Lilliendahl fékk í gær sent bréf heim til sín frá aðdáanda þar sem hún er brýnd til dáða í feminískri baráttu sinni.

Fyrst þegar Hildur sá bréfið á gólfinu undir lúgunni brá henni nokkuð í brún og hélt jafnvel það væri hótunarbréf eða eitthvað í þeim dúr. Hún hefur verið mikið milli tannanna á fólki fyrir að standa vörð um réttindi kvenna og stuðla að jafnrétti í samfélaginu. Í gegnum tíðina hafa margir ausið yfir hana svívirðingum á internetinu meðan aðrir keppast við að dásama hana.

„Ég þoli ákveðið mikið áreiti á netinu en um leið og eitthvað fer inn fyrir dyrnar heima hjá mér kemst ég auðveldlega úr jafnvægi," sagði Hildur á Facebook, en þegar hún opnaði bréfið reyndist það aftur á móti fallegt aðdáandabréf.

Í bréfinu stóð meðal annars:

„Ég get fullvissað þig um það að fyrir hvern af þessum aumingjum og ómennum átt þú 1000 aðdáendur eins og mig" og „Barátta þín hefur gert mig að stoltum öfgafemínista ... og fyrir það er ég þakklátur" og „Framganga þín hefur virkað sem herkvaðning á mig og ég heiti því að beita mér af þunga."

Hildur var hálfpartinn klökk þegar hún hafði opnað bréfið og skrifaði færslu á facebook sem endaði á orðunum „Fólk er svo fallegt."

Bréfið var þéttskrifað á tveimur síðum. Það tengdist ekki beinlínist atvikum síðustu viku þegar þáttarstjórnendur útvarpsþáttarins Harmageddon tóku sér leyfi frá störfum eftir að Hildur benti á afar svæsið viðtal þar sem tónlistarmaður fór ófögrum orðum um konur.

„Hann hafði greinilega fylgst með mér í langan tíma og lengi langað að hafa samband við mig," segir Hildur.

Athugasemd ritstjórnar: Í fyrstu var greint frá því að bréfið hefði verið nafnlaust. Svo var ekki og er því hér með komið á framfæri.