Náði heilsu með hjálp græðara eftir krabbameinsmeðferð

Fjórir þingmenn og varaþingmenn Vinstri-grænna og Samfylkingarinnar vilja að velferðarráðherra skipi starfshóp sem kannar hvort að niðurgreiða skuli heildrænar meðferðir græðara til jafns við aðra heilbrigðisþjónustu eða undanskilja þær virðisaukaskatti. Þingmennirnir hafa lagt fram tillögu þessa efnis á Alþingi. Í hópnum eru varaþingmennirnir Guðrún Erlingsdóttir og Bjarkey Gunnarsdóttir og þingmennirnir Ólína Þorvarðardóttir og Álfheiður Ingadóttir sem er fyrrverandi heilbrigðisráðherra.

„Það er staðreynd að það eru mjög margir sjúklingar sem að velja allskyns heildrænar meðferðir, eins og það er kallað, eða fara til græðara frekar heldur en að taka lyf og það eru margir sem að telja sig hafa af því mikla bót og það eru til rannsóknir sem sýna að slíkar meðferðir geta gagnast og gagnast jafnvel betur heldur en lyf, sem oft hafa aukaverkanir og þegar að fólk er sjúklingar þá lítur það öðrum augum á lífsgæðin. Ég hef sjálf ágæta reynslu af því að byggja mig upp eftir erfiðan sjúkdóm og það gerði ég með aðstoð góðra græðra og tel mig búa að því enn þá en það var býsna dýrt."

Þannig segir Álfheiður meðferð græðara hafa hjálpað sér mikið eftir veikindin. Hún leggur þó áherslu á að hún hafi notið fyrsta flokss læknisþjónustu en eftir að læknismeðferð lauk hafi græðarar hjálpað henni að byggja sig upp.

„Ég er krabbameinsjúklingur og hef farið í gengum stóra skurðaðgerðir og lyfjameðferð og mér tókst mér mjög vel að ná minni heilsu einmitt með aðstoð góðra græðara eftir að lyfjameðferð er lokið þá er líkaminn svolítið mikil rúst," segir Álfheiður.

Álfheiður segir það geta verið kostnaðarsamt fyrir sjúklinga að fá meðferð hjá græðara og erindi hafi oft komið til Sjúkratrygginga Íslands um það hvort að fólk fái að njóta aðstoðar við annað heldur en lyf. „Ég vil gjarnan styðja við það að það verði skoðað vandlega hvort við getum ekki bætt þjónustu við sjúklinga með öðru heldur en niðurgreiðslu á lyfjum," sagði Álfheiður Ingadóttir.