Hætt við Holtsgöng

Borgarstjórn samþykkti í dag breytingu á svæðisskipulagi vegna Holtsgangna og byggingarsvæðis númer 5. Svæðisskipulagstillagan var samþykkt í skipulagsráði 7. nóvember síðastliðinn samkvæmt tilkynningu frá borginni.

Í tilkynningunni segir:

Tillaga að breyttu svæðisskipulagi gerir ráð fyrir tvíþættum breytingum. Annars vegar verður fallið frá gömlum áformum um Holtsgöng, sem ætlað var að tengja Sæbraut við Hringbraut. Hins vegar verður byggingarmagn aukið á byggðasvæði nr. 5 í tengslum við uppbyggingu á Landspítala Háskólasjúkrahúsi. Staðsetning gangnamunna Holtsganga var áætluð á því svæði en samræmist ekki þeim áformum.

Í umsögn svæðisskipulagsnefndar um áhrif af niðurfellingu Holtsganga segir að þau hafi ekki mikla svæðisskipulagslega þýðingu í stofnbrautakerfi höfuðborgarsvæðisins. Göngin hafa ekki verið á áætlun Vegagerðarinnar um stofnbrautarframkvæmdir og gerir hún ekki athugasemdir við áformin í umsögn sinni.

Ekki er talið að niðurfelling Holtsganga muni hafa áhrif til umferðaraukningar á einstökum götum í Þingholtum og Skólavörðuholti.

Í umsögn fagráðs svæðisskipulagsnefndar segir að það sé álit fagráðs að talsvert hafi skort á að raunhæfni Holtsganga hafi verið metin til fullnustu á sínum tíma og að allt bendi nú til þess að gagnsemi þeirra sé lítil og í engu samhengi við tilkostnaðinn. Ráðið telur það því vera eðlilegt skref að fella þau út úr svæðis- og aðalskipulagi.

Fagráðið telur einnig að aukning byggingarmagns á svæði númer 5 muni ekki hafa óæskileg áhrif á umferð á stofnbrautakerfinu.