Engin þjóð myndi sætta sig við árásir eins og Ísrael hefur orðið fyrir

Ástæðan fyrir árásum Ísraelar gagnvart Palestínumönnum er helst sú að skotið hefur verið yfir þúsund flugskeytum frá Palestínu yfir til Ísraels á þessu ári. „Það er engin þjóð sem myndi sætta sig við slíkt," útskýrði Gísli Freyr Valdórsson, fréttamaður á Viðskiptablaðinu í viðtali í Harmageddon.

Hann tók sérstaklega fram að hann væri ekki að réttlæta stríð, slíkt væri ekki hægt undir nokkrum kringumstæðum.

Gísli snéri meðal annars dæminu yfir á Ísland, og spurði hvort Reykvíkingar myndu sætta sig við það að lifa í stöðugum ótta við flugskeyti. Ísraelar hafa svarað flugskeytaárásum frá Palestínu með linnulausum flugskeytaárásum undanfarna daga, en fjölmargir hafa látið lífið, konur og börn þar á meðal.

Reynt hefur verið að miðla friði undanfarna daga. Menn voru bjartsýnir í dag að vopnahlé yrði samþykkt í kvöld, en ekkert bendir til þess að slíkt verði.

Gísli tekur fram að Hamas samtökin séu lítið annað en hreinræktuð hryðjuverkasamtök, þrátt fyrir að samtökin séu lýðræðislega kjörin í Palestínu. Hann segir þann sem sprengir strætisvagn fyrir hádegi og kemst inn á þing eftir hádegi, ekki hætta að vera hryðjuverkasamtök.

„Og nefnið eina þjóð í heiminum sem myndi ekki bregðast við ef það væri skotið flugskeytum á það?" spurði Gísli svo. Hægt er að hlusta á fróðlegt viðtal við Gísla hér fyrir ofan eða á útvarpsvef Vísis.