Vitnum og sakborningum hótað

Þriðja degi aðalmeðferðar í máli ákæruvaldsins gegn þeim Annþóri Karlssyni og Berki Birgissyni er lokið.

Í framburði lögreglumanns, sem tók saman skýrslur vitna og brotaþola, kom fram að þeim hafði verið hótað ofbeldi ítrekað vegna framburðar síns.

Þannig greindi lögreglumaðurinn frá því að eitt vitni hið minnsta hefði breytt framburði sínum af ótta við ákærðu.

„Hann vildi ekki draga þetta til baka," sagði lögreglumaðurinn. „En þorði ekki öðru. Hann sagði að byssu hefði verið miðað á sig."

Þá hafði einn sakborningur, sem var ákærður fyrir aðild sína að líkamsárás í Mosfellsbæ, samband við lögreglu. Í hljóðupptöku sem spiluð var fyrir dóminn sagði hann að Annþór hefði haft samband við tengdamóður sína. Síðar meir var haft samband við barnsmóður hans og henni gert að koma skilaboðum til hans. „Þar var spurt hvort að ég væri vinur þeirra (Annþórs og Barkar) eða lögreglunnar."

Aðalmeðferð er lokið í dag en henni verður framhaldið á morgun með málflutningi verjenda og saksóknara.