Stóriðjusamningar gætu klárast um mitt næsta ár

Forstjóri Landsvirkjunar gerir ráð fyrir að orkusamningar vegna stóriðju við Húsavík klárist um mitt næsta ár. Rammasamningar hafa verið gerðir við fjögur fyrirtæki.

Fullur salur af fólki hlýddi á forystumenn Landsvirkjunar fara yfir stöðu félagsins og verkefnin framundan á haustfundi á Hilton Reykjavík Nordica-hótelinu í dag. Áformað er að næsta orkuuppbygging vegna stóriðju verði í Þingeyjarsýslum og kom fram hjá Herði Arnarsyni, forstjóra Landsvirkjunar, að rammasamkomulag lægi fyrir við fjögur fyrirtæki og taldi hann að einhver þeirra færu af stað óháð fjármálakreppunni.

Í viðtali í fréttum Stöðvar 2 kvaðst Hörður telja að orkusamningar gætu klárast á miðju næsta ári en það væri þó óvíst. Þýska fyrirtækið PCC er talið vera komið lengst í undirbúningi en það áformar smíði kísilverksmiðju við Húsavík. Virkjanaframkvæmdir gætu þó hafist fyrr en Landsvirkjun undirbýr virkjanir bæði í Bjarnarflagi og á Þeistareykjum.