Perlan fari úr einum vasa í annan

Borgarráð samþykkti á fundi sínum í morgun að borgin gangi til samninga við Orkuveitu Reykjavíkur um kaup á Perlunni í Öskjuhlíð. Þá mun borgin ganga til samninga við ríkið um að það leigi húsið í allt að 15 ár og komi þar upp náttúruminjasýningu.

Þetta kemur fram í tilkynningu frá Reykjavíkurborg. Þar segir að ef samningar takast við OR um kaupin og ríkir leigir húsið fyrir náttúruminjasýningu, muni Reykjavíkurborg gera breytingar á Perlunni fyrir allt að 100 milljónir króna svo hægt verði að koma þar upp glæsilegri sýningu um náttúru Íslands.

„Stefnt er að því að byggja milligólf í hluta Perlunnar og opnað verður betur inn í hitaveitutankinn þar sem Sögusýningin var til húsa áður.

Í greinargerð með tillögunni kemur fram að með kaupunum verði almenningi áfram tryggður aðgangur að Perlunni og umhverfi hennar, þó með þeim takmörkunum að selt verður inn á náttúruminjasýninguna. Með kaupunum gefst Reykjavikurborg einstakt tækifæri til þess að stjórna uppbyggingu og nýtingu svæðisins í Öskjuhlíð sem Perlan stendur. Nú er í gangi skipulagssamkeppni um Öskjuhlíðina á vegum skipulagsráðs Reykjavíkurborgar.

Heimild borgarráðs er bundin við það að viðunandi leigusamningur um sýningu Náttúruminjasafns Íslands náist við ríkið," segir í tilkynningunni.