Segir sjö ára fangelsi allt of mikla refsingu

„Krafa um sjö ára fangelsi er einfaldlega allt of há." Þetta sagði verjandi Barkar Birgissonar í málflutningi sínum fyrir Héraðsdómi Reykjaness í dag. Börkur er, sem kunnugt er, ákærður fyrir aðild að miklu ofbeldisbrotamáli ásamt níu öðrum. Saksóknari hefur farið fram á sjö ára fangelsi yfir Berki en átta ára fangelsi yfir Annþóri Kristjáni Karlssyni.

Verjandi gagnrýndi vinnubrögð bæði ákæruvaldsins og lögreglunnar í málinu, allt frá upphafi til dagsins í dag.

Þannig hafi það verið einbeittur ásetningur lögreglu að bendla Annþór og Börk við nokkrar stórfelldar líkamsárásir sem áttu sér stað á höfuðborgarsvæðinu árin 2011 og 2012.

„Hlutlægni var ekki gætt. Rannsóknin beindist að Berki og Annþóri. Verður ekki annað séð en að yfirheyrslur snúist um að koma sök á þessa sakborninga. Rannsókn málsins var því ekki í samræmi við meðferð sakamála. Með þetta í huga verður að gera enn frekari sönnunarkröfu." Þá benti verjandi á vitnisburði bæði brotaþola og sakborninga hafi verið á reiki við skýrslugjöf á upphafsstigi málsins.

„Framburður helsta vitnis ákæruvaldsins um sekt Barkar hefur verið þvers og kruss. Hann er margsaga og neitar allri sök í upphafi. Þegar líður á breytist framburður hans eftir veru í gæsluvarðhaldi. Ekkert mark á að taka á framburðum hans, nema þá sakborningum í hag," sagði verjandi. Var verjanda mikið í mun að benda á að lögregla hafi ekki gefið öðrum aðilum gaum þegar rannsókn málsins stóð yfir.

„Sekt Barkar byggir á huglægri afstöðu. Ákæruvaldið hefur lagt málið þannig upp að Börkur sé aðalmaðurinn í málinu. Nægileg sönnunargögn liggja ekki fyrir. Þá er skorað á virðulegan dóm að fara yfir hljóð- og mynddiska úr skýrslutökum þegar niðurstaða er ákveðin.

Mál Barkar var lagt í dóm. Frávísunar var krafist og til vara sýknu. Þá sagði verjandi að Börkur bæri ekki bótatjón á þeim áverkum sem hann er sagður bera ábyrgð á.

Þeir Annþór og Börkur eru báðir viðstaddir réttarhöldin í dag. Þeir kröfðust þess í morgun að fá að ávarpa réttinn eftir að málflutningi lýkur og munu að öllu óbreyttu gera það.