Segir skjólstæðing sinn hafa átt harma að hefna

„Skjólstæðingur minn viðurkennir að hafa ráðist gegn Bergi Má með sleggju. Þó óafsakanlegt sé, þá átti ákærði Smári harma að hefna gegn brotaþola."

Þetta er á meðal þess sem Vilhjálmur Vilhjálmsson, verjandi Smára Valgeirssonar, sem ákærður er fyrir sérstaklega hættulega líkamsárás sem átti sér stað í Háholti í Mosfellsbæ, þann 4. janúar árið 2012.

Smári hefur játað að hafa ráðist á Berg Má Ágústsson, húsráðanda í Mosfellsbæ, með sleggju.

Í málflutingi sínum benti verjandi Smára á að atvikið í Háholti hafi átt sér aðdraganda. Vísaði hann þar til árásar sem átti sér stað í Hafnarfirði. Þar veittist Bergur Már, ásamt öðrum, að Smára og Sigmundi Geir Helgasyni, með gaddakylfu. „Lögreglan og ákæruvald virtist ekki hafa sérstaka áhuga á þessu atviki," sagði verjandi. „Og átti jafnvel að þegja það í hel."

Þrátt fyrir að Smári hafi játað aðild sína að árásinni í Háholti benti verjandi hans á að það væri með öllu ósannað hvaða áverkar hlutust af þessari árás. Að sama skapi hafi ákæruvaldið ekki fært sönnur á aðild Smára að samverknaði eða skipulagningu árásarinnar.

„Sakfella ber ákærða Smára út frá játningu hans en sýkna af öðrum. Það liggur fyrir að það að ráðast gegn manni með sleggju er hættuleg aðferð og ákærði játar þetta skilyrðislaus," sagði Vilhjálmur.

Þá benti verjandi á Facebook-skilaboð sem Bergur Már sendi Annþóri nokkru eftir árásina. Í þeim komi fram að Smári væri feigur. „Hálfu ári síðar ræðst Bergur már á ákærða Smára á Moe's bar, stingur hann með hníf og reynir að stinga hann í hálsinn, kæra vegna þessa liggur fyrir."