Krafa Sigurðar samþykkt að hluta

Hæstiréttur staðfesti í dag dóm Héraðsdóms Reykjavíkur í deilumáli Sigurðar Einarssonar, fyrrverandi stjórnarformanns Kaupþings, við slitastjórn bankans. Við slit Kaupþings lýsti Sigurður kröfu, meðal annars vegna vangoldinna launa og annarra launatengdra greiðslna.

Slitastjórnin samþykkti kröfu Sigurðar aðeins að hluta og stefndi Sigurður því þrotabúinu. Hann taldi sig meðal annars eiga rétt á biðlaunum í 12 mánuði eftir starfslok auk lífeyrisgreiðslna samkvæmt ráðningarsamningi. Þá taldi hann líka að Kaupþing hefði ábyrgst að greiða skattaskuld sína í Bretlandi.

Hæstiréttur telur að 6 mánaða uppsagnarfrestur væri sanngjarn frestur í ljósi þeirra uppsagnarfresta sem tíðkaðist almennt á vinnumarkaði, svo og með tilliti til stöðu og starfskjara Sigurðar að öðru leyti. Þá var talið að Sigurður gæti ekki átt aðild að kröfu um vangoldin iðgjöld til lífeyrissjóða heldur væri það viðkomandi lífeyrissjóður sem ætti slíka kröfu gegn Kaupþingi og var kröfu Sigurðar um greiðslu lífeyrissjóðsiðgjalda því hafnað. Að endingu var talið að Sigurði hefði ekki tekist að sanna skyldu Kaupþings til að taka þátt í skattgreiðslum hans í Bretlandi og var kröfu þess efnis því einnig hafnað.