Hálka um land allt í kvöld og í nótt

Miklar líkur eru á ísingar eða glerungsmyndun á vegum um allt land í kvöld og nótt samkvæmt tilkynningu frá Vegagerðinni.

Í ábendingu frá verðurstofu segir að hiti sé rétt um og yfir frostmarki við ströndina og veghiti í kringum frostmark, einnig er vindur víðast hvar hægur. Hálkan myndast því um leið og birtu bregður.

Úrkoma til landsins á sunnanverðu landinu í nótt verður líklega í formi slyddu eða snjókoma og mun því auka enn frekar á hálkumyndun þar.

Færð og aðstæður

Hálka er á Hellisheiði og í Þrengslum. Hálka eða hálkublettir eru einnig mjög víða á Suðurlandi.

Um vestanvert landið er hálka á Fróðárheiði, Bröttubrekku og Holtavörðuheiði og hálkublettir á Vatnaleið og Laxárdalsheiði. Hálka eða hálkublettir eru mjög víða á láglendi. Á Vestfjörðum er hálka á fjallvegum og í Ísafjarðardjúpi annas eru hálkublettir á láglendi.

Á Norðurlandi er víðast hvar hálka eða hálkublettir á vegum. Á Norðaustur- og Austurlandi er hálka eða hálkublettir á flestum leiðum en þó er vegurinn frá Reyðarfirði með ströndinni í Vík greiðfær.