Stálu dekkjum og skildu bílinn eftir á trékubbum

Dekkjum var stolið undan bifreið á athafnasvæði Guðmundar Tyrfingssonar ehf., í Fosstúni á Selfossi í síðustu viku. Bifreiðin var svo skilin eftir á trékubbum. Alls voru sjö þjófnaðir kærðir til lögreglu í síðustu viku. Hjólbarðaþjófar voru á ferðinni á Selfossi. Þá bárust lögreglunni tvær kærur vegna þjófnaðar í Húsasmiðjunni á Selfossi.

Aðfaranótt fimmtudags var bensíni stolið af bifreið þar sem hún stóð við Bakkabraut í Reykholti. Þjófurinn braut rúðu í bifreiðinni til að opna bensínlokið. Tjón bíleigandans er talsvert. Brotist var inn í bifreið við Álftarima 9 á Selfossi og stolið úr henni bassakeilu.

Tveir voru kærðir fyrir vörslu á kannabisefnum. Í báðum tilvikum beindist grunur að þessum einstaklingum þegar lögreglumenn voru í umferðareftirliti. Báðir viðurkenndu brot sín.

Hálkan tók sinn toll í síðustu viku. Tólf umferðaróhöpp af ýmsum toga voru tilkynnt til lögreglu. Engin alvarleg slys urðu á fólki.