Vindmyllur eru spennandi möguleiki

Vindorka gæti orðið þriðja stoðin í orkukerfi Landsvirkjunar, ásamt vatnsafli og jarðvarma. Vindmillur þykja nýr og áhugaverður orkuvinnslumöguleiki á Íslandi.

Eins og fram hefur komið voru fyrstu vindmillur Landsvirkjunar fluttar á áfangastað í dag og áformað að reisa þær í desember. Þetta er hluti af rannsóknar- og þróunarverkefni Landsvirkjunar í hagkvæmni vindorku á Íslandi.

„Landsvirkjun leggur áherslu á skilvirka orkuvinnslu og framþróun sem eina af grunnstoðum starfseminnar og eru rannsóknir á vindorku hluti af þeirri stefnu. Litið til framtíðar gæti vindorka orðið þriðja stoðin í orkukerfi Landsvirkjunar, ásamt vatnsafli og jarðvarma," sagði Hörður Arnarson, forstjóri Landsvirkjunar.

Það er áhugavert að kanna hvernig vindorka getur nýst Íslendingum, segir í fréttatilkynningu frá Landsvirkjun. Á undanförnum áratug hefur nýting vindorku aukist mjög í heiminum, tækni fleygt fram og kostnaður lækkað. Þetta er því áhugaverður kostur til að fjölga orkuvinnslumöguleikum Landsvirkjunar og draga þannig úr áhættu.

Ásýnd

Líkt og öll stór mannvirki hafa vindmyllur óhjákvæmileg áhrif á ásýnd umhverfisins. Varanleg áhrif á heildarásýnd umhverfisins eru þó ekki talin mikil í samanburði við aðra virkjanakosti. Vindmyllur og undirstöður má auðveldlega fjarlægja ef leggja á framleiðsluna niður og þá er landið nær óspillt.

Myllurnar eru 77 metra háar í fullri reisn og eru því gríðarlega háar. Þær ná fullu afli við 15 metra vindhraða á sekúndu. Gert er ráð fyrir að rafmagnsframleiðsla stöðvist ef vindhraði er minni en 3 metrar á sekúndu. Framleiðsla minnkar ef vindur fer upp fyrir 28 metra á sekúndu og stöðvast alveg ef vindur fer upp fyrir 34 metra á sekúndu.

Reynsla

Með tilraunavindmyllunum fæst dýrmæt reynsla af rekstri vindaflsstöðva langt frá sjó og við íslensk veðurskilyrði. Til dæmis er mikilvægt er að afla upplýsinga um magn og tíðni ísingar til að geta metið áhrif hennar á reksturinn. Vindmyllurnar verða reistar í um 250- 270 metra hæð yfir sjávarmáli og því fæst dýrmæt reynsla, í ljós kemur hvort skýjaísingar sé að vænta og hvort skafrenningur, ösku- og sanfok eða dýralíf hefur áhrif á framleiðsluna.

Myndband frá Landsvirkjun