Eignaðist litla Jón Gnarr brúðu

Jón Gnarr, borgarstjóri, fékk í dag litla eftirmynd af sjálfum sér að gjöf frá pólskum fréttamanni. Dúkkan kom Jóni skemmtilega á óvart sem sagði strax „Þetta er mini me," himinlifandi.

Fréttamaður pólska fréttavefsins Informacje, Marta M. Niebieszczanska, tók viðtal við Jón Gnarr í dag. Hún ræddi m.a. um starfið, fjölmenningu, samráðsvefinn Betri Reykjavík og fleira. Þá ræddu þau hvernig borgarstjóra gangi að flétta saman starf sitt sem æðsti embættismaður borgarinnar og vera listamaður.

Í lok viðtalsins afhenti hún borgarstjóra litla brúðu sem er eftirlíking af honum sjálfum þegar hann klæddist bleiku jakkafötunum í tilefni af baráttudegi gegn brjóstakrabbameini. Brúðuna gerði pólskur listamaður, Tadeusz Wnęk, en hann býr í borginni Żywiec. Honum þykir hafa tekist vel til þar sem hann gerði brúðuna alfarið eftir ljósmynd.