Kraftlyftingarkona drakk ammoníak fyrir slysni

Kona var færð á spítala um helgina eftir að hún drakk fyrir slysni ammoníak á kraftlyftingarmóti sem haldið var á vegum Kraftlyftingarsambandsins í Reykjavík.

Konan, sem er á fertugsaldrinum, var sjálf keppandi á mótinu. Hún hafði verið á upphitunarsvæði svokölluðu að bíða eftir að röðin kæmi að henni þegar hún fékk sér sopa úr brúsa sem hún hélt að innihéldi íþróttadrykk. Í ljós kom að brúsinn innihélt ammoníak.

Konan kenndi sér samstundis meins, enda afar hættulegt að innbyrða ammoníak. Hringt var á sjúkrabíl sem færði konuna samstundis á spítala og lögreglan kom á vettvang.

„Þetta virtist mjög alvarlegt í upphafi," segir Sigurjón Pétursson, formaður Kraftlyftingarsambandsins, en hann bætir við að þetta hafi farið betur en á horfði. Hann viti þó ekki hvort konan beri varanlegan skaða af.

Sigurjón útskýrir að lyftingarmenn noti oft nokkurskonar ammoníakhylki sem er brotið og lyftingamaðurinn andar að sér. Slík hylki eru leyfileg og eru hugsuð til þess að auka þrótt lyftingarmannsins tímabundið.

Ekki er ljóst hvort ammoníakið sem konan drakk hafi verið samskonar efni sem var blandað við vatn, en efnið er til rannsóknar að sögn Sigurjóns.

„Við vitum satt að segja ekki nákvæmlega hvernig þetta atvikaðist," segir Sigurjón en stjórnarfundur verður haldinn í næstu viku og vonar Sigurjón að þá muni málsatvik hafa skýrst. Hann segir að stjórnin muni svo taka ákvörðun eftir að hún hefur skoðað málið. Spurður hvort það séu einhver viðurlög við að hafa ammoníak í vökvaformi, svarar Sigurjón því að ekki sé ljóst nákvæmlega hverskyns efni um sé að ræða, hitt sé grafalvarlegt að hafa svona lagað í ómerktum drykkjarumbúðum.

„En við eigum eftir að skoða betur hvaða viðurlög séu við hæfi í svona tilvikum," útskýrir Sigurjón. „Þetta er bara fyrst og fremst ótrúlega leiðinlegt," bætir hann við.

Vitað er hver eigandi flöskunnar er. Ekki er ljóst hvaða farveg málið fær innan lögreglunnar. Konan er á batavegi.

Hægt er að fræðast betur um eiturefnið á vef Vísindavefsins hér.