Óttast að breytingar torveldi rannsókn mála

Ýmis félög sem koma að löggæslu í landinu mótmæla harðlega fyrirhuguðum breytingum á heimildum lögreglu til símahlerana sem fram koma í frumvarpi innanríkisráðherra um breytingar á lögum um meðferð sakamála.

Ákærendafélagið telur að eftir breytingarnar verði mjög torsótt fyrir lögreglu að fá heimild til að hlera síma í þágu rannsóknar máls. Daði Kristjánsson, varaformaður ákærendafélagsins, var gestur í útvarpsþættinum Reykjavík Síðdegis.

Það eru einkum tvö atriði sem félagið finnur að. „Annars vegar er verið að herða almennt á skilyrðum þess að lögreglu sé unnt að fá úrskurð dómara um símahlerun. Það er verið að bæta við skilyrðum um að ríkir almanna- eða einkahagsmunir séu til staðar," segir Daði.

„Hins vegar er verið að taka út undantekningarheimild um að heimilt sé að fá símahlerunarúrskurð þó lágmarksrefsiskilyrði séu ekki uppfyllt. Sú heimild er nauðsynleg vegna vægari afbrota þegar sérstaklega stendur á."

Breytingarnar koma til með að torvelda mjög rannsókn mála. „Við teljum það verði mjög torsótt að fá heimild til að hlera síma ef lögregla þarf alltaf að sýna fram á að þessir ríku almannahagsmunir séu í húfi," segir Daði og telur að lögregla muni ekki fá leyfi til hlerana nema í allra alvarlegustu málunum.

„Við óttumst að dómstólar munu túlka þessar heimildir mjög þröngt eftir breytingarnar," segir hann og telur mögulegt að pólitísk sjónarmið ráði för í þessu máli.

Innslagið allt má nálgast á hlekknum hér að ofan.