Slegið í gegn við Búðarhálsvirkjun

Síðastliðinn þriðjudag var slegið í gegn í jarðgangagerðinni við Búðarhálsvirkjun, þ.e. aðrennslisgöngin í gegnum fjallið opnuðust í fyrsta sinn. Af því tilefni var boðið upp á léttar veigar og menn fögnuðu áfanganum enda hefur verkið verið krefjandi.

Að undanförnu hafa um 300 manns verið að störfum á verkstað. Þó verkamenn séu nú komnir í gegn er gangagerðinni þó ekki lokið að fullu þar sem enn er eftir nokkur vinna við neðri hluta ganganna. Gert er ráð fyrir því að stöðin verði gangsett fyrir árslok 2013.

Jarðgöngin, aðrennslisgöng virkjunarinnar eru 4 km að lengd og jarðfræðilegar aðstæður í fjallinu eru fjölbreytilegar. Stöðvarhúsið er grafið í allsprungið líparít sem telst einsdæmi hér á landi.

Vesturhluti aðrennslisganganna er auk þess í nokkuð ummynduðu bergi þar sem skiptast á setlög og basaltlög. Austurhluti þeirra er hins vegar í þykku og hörðu basalti. Verktakinn í verkinu er Ístak hf. og hafa gangamenn fyrirtækisins þurft að glíma við þessar ólíku aðstæður í sínu verki en með góðum mannskap og mikilli reynslu hefur þeim tekist það með ágætum.

Búðarhálsvirkjun er virkjun í Tungnaá og nýtir um 40 metra fall í ánni frá frávatni Hrauneyjafossvirkjunar að Sultartangalóni. Uppsett afl stöðvarinnar verður 95 MW og árleg orkuvinnslugeta er áætluð 585 GWst. Hér að neðan er afstöðumynd af virkjuninni.