Engin heimild var til staðar fyrir ríkisábyrgð handa Farice

Ríkisendurskoðun átelur innanríkisráðuneytið fyrir óljós fjárframlög til Farice ehf., en alls hefur ríkissjóður veitt félaginu 4,2 milljarða króna í framlög frá árinu 2002 til 2011 og það er ljóst að félagið mun þurfa meira fé áður en yfir lýkur.

Farice ehf., á og rekur sæstrengi milli Íslands og Evrópu.

Í nýrri skýrslu Ríkisendurskoðunar er fjallað um þjónustusamning ríkisins við Farice ehf. frá apríl á þessu ári en ríkissjóður og Landsvirkjun eiga 60% hlut í félaginu.

Einnig er fjallað um forsögu samningsins. Meðal annars kemur fram að á árunum 2002 til 2011 lagði ríkissjóður Farice ehf. og forverum þess félags til alls 4,2 milljarða króna í formi hlutafjár, skammtímalána eða áhættugjalda sem breytt var í hlutafé. Jafnframt hefur hann veitt þeim rúmlega 7 milljarða króna ábyrgðir vegna lántöku þeirra. Félögin hafa engu að síður verið rekin með tapi allt frá upphafi og enn sjást ekki merki um verulega tekjuaukningu Farice ehf. frá gagnaverum eins og að hefur verið stefnt.

Þá bendir Ríkisendurskoðun einnig á að ekki sé heimilt að veita ríkisábyrgð nema fyrir liggi heimild í lögum og umsögn Ríkisábyrgðasjóðs. Einnig eigi að greiða svokallað áhættugjald þegar slík ábyrgð sé veitt.

Að mati Ríkisendurskoðunar voru þessi skilyrði ekki ávallt uppfyllt við veitingu ábyrgða á lánum Farice. Stofnunin beinir því til fjármála- og efnahagsráðuneytisins að það tryggi að skilyrði laga um ríkisábyrgðir séu ávallt uppfyllt þegar þær eru veittar.

Enn fremur beri ráðuneytinu að sjá til þess að greinargerð með frumvarpi til fjár- og fjáraukalaga hverju sinni geymi fullnægjandi upplýsingar um umfang og eðli þeira skuldbindinga sem áformað er að stofna til. Ljóst þykir að veita þurfi mun meira fé inn í fyrirtækið áður en yfir lýkur.

Hægt er að lesa grein um skýrsluna á vef Ríkisendurskoðanda.