Nýjasta æðið: Fólk hreyfir sig utandyra eins og börn

Nýjasta æðið í heimi líkamsræktarinnar byggir á því að fólk hreyfi sig utandyra eins og börn. Hópurinn sem stundar þessa nýjung segir þetta það svalasta sem líkamsræktarheimurinn bjóði upp á um þessar mundir.

Líffræðingurinn Pétur Halldórsson telur manninum eðlilegast og hollast að stunda líkamsrækt undir berum himni í öllum veðrum og ekki bara einhverja hreyfingu heldur eigi hún að nýtast manninum, auka frelsi hans og náttúrulega færni.

„Ég kynntist þessu eiginlega fyrir tilviljun þegar ég var að leita mér að hreyfingu. Mér fannst ég vera orðinn svolítið óheilbrigður og fannst sem ég þyrfti að koma mér í form þótt ég vissi ekkert hvað það þýddi. Eftir að hafa prófað alls konar hluti þá rakst ég á svokallað Movnat en það eru samtök út í heimi sem þjálfa þessar hreyfingar. Þetta snýst ekki um að þjálfa til að ná fram einhverju ákveðnu útliti heldur líkamlega getu. Við viljum geta gert þessar náttúrulegu hreyfingar, það er að ganga, hlaupa, hoppa, klifra, skríða, synda, kafa, lyfta, bera, kasta, grípa og sjálfsvörn," segir Pétur Halldórsson, líffræðingur og stofnandi Náttúruhreyfingar.

Hreyfingarnar nýtast vel í daglegu lífi. Í myndbandinu má sjá hvernig hægt er að lyfta og bera manneskju án þess að þunginn reyni mikið á burðarmennina. En slíkt er mjög gagnlegt að kunna, til dæmis ef koma þarf slösuðum ferðafélaga til byggða. Auk þess sem má sjá Pétur rífa upp stein og skella á öxlina með æfðum hreyfingum. Fréttmaður reyndi fyrir sér, í fyrstu tókst honum ekki að bifa steininum en eftir að hafa fengið leiðbeiningar um rétta stöðu hjá þjálfanum gekk þetta.

„Þetta er ekki bara það að gera allar þessar hreyfingar heldur er ég að kenna fólki að gera þær betur, maður þarf að vera öruggur í hreyfingunni og leggja ekki of mikið álag á líkamann. Þetta snýst þannig um að gera allt það sem við getum fyrir og vera góð í því."

Pétur segir ólíkt meira frelsi felast í þessum æfingum heldur en þeim sem byggja á endurteknum lyftum á líkamsræktarstöðvum. Nú stundi um 50 manns þessar æfingar hér á landi en vinsældir þeirra aukist mjög út í heimi. Pétur segir hreyfinguna er orðna stóra í heiminum og höfði jafnt til Kínverja sem Bandaríkjanna. Nánar má kynna sér málið á síðunni nátturuhreyfing.is auk þess sem grein um málið er einnig að finna á síðunni bleikt.is.