Snorri: Ætla ekki að spila jafn mikið og Gummi Hrafnkels

"Við erum með undirtökin allan leikinn og það er meira fyrir okkar klaufaskap en þeirra gæði að við náum ekki almennilega forskoti fyrr en í lokin," sagði leikstjórnandinn Snorri Steinn Guðjónsson.

"Við erum oft með fjögurra til sex marka forystu en verðum kannski of værukærir. Við sýndum samt úr hverju við erum gerðir þegar á þurfti að halda.

"Þetta er átta marka sigur en hann hefði auðvitað getað orðið stærri. Við eigum það til að vera lengi í gang og höfum oft verið lengur að því en í dag. Heilt yfir held ég samt að við getum verið sáttir þó alltaf megi gera betur."

Snorri lék sinn 200. landsleik í kvöld en hversu marga leiki ætlar hann að ná?

"Ég veit það ekki en þeir verða alveg klárlega færri en hjá Gumma Hrafnkels. Ég verð samt hérna áfram á meðan ég er valinn og er í formi."