Gæti hugsað sér að bakka aftur yfir Hildi - sviptur ökuréttindum ævilangt

Femínistanum Hildi Lilliendahl hefur verið úthýst af Facebook eftir að hún birti skjáskot af orðum manns sem heitir Stefán Heiðar Erlingsson. Ummælin birtust á Facebook-reikningi Stefáns en þar segir hann Hildi vera einu konuna sem hann gæti hugsað sér að bakka aftur yfir og stöðva bílinn ofan á líkama Hildar og skilja faratækið þar eftir í handbremsu. Þess má geta að árið 2009 var Stefán Heiðar sviptur ökuréttindum ævilangt þegar hann var fundinn sekur um að aka undir áhrifum fíkniefna.

Eva Hauksdóttir, þjóðfélagsgagnrýnandi kemur Hildi til varnar og hefur hafið undirskriftarsöfnun þar sem hún krefst þess að Facebook láti af ritskoðunartilburðum sínum og gefi Hildi aftur aðgang að Facebook.

Á bloggi sínu skrifar Eva um málið: „Ég er oft ósammála Hildi Lilliendahl en ég virði tjáningarfrelsi hennar. Ég hef stundum verið ósammála þeirri merkingu sem hún leggur í ummæli en ég hef ekki séð hana fara rangt með staðreyndir eða flíka gervirannsóknum".

Hún bætir svo við: „Samkvæmt reglum fb [Facebook] er notendum óheimilt að birta skjáskot af fb nema með sérstöku leyfi. Reglurnar eru væntanlega settar í þeim tilgangi að vernda notendur gegn ýmisskonar misnotkun. Hugmyndin er varla sú að auðvelda pólitískar ofsóknir en með því að refsa þeim sem birta persónulegar árásir af þessu tagi, snúast reglurnar gegn markmiði sínu."

Af þessum ástæðum hefur Eva hafið undirskriftarsöfnunina.

Eva segist raunar ætla að gera það sama og Hildur, eða birta skjáskotið reglulega þannig að það sé alltaf sýnilegt á veggnum á hennar eigin Facebook-reikningi, eða þar til banninu hefur verið aflétt af Hildi eða hún sjálf útilokuð vegna sömu reglna.

Um Stefán Heiðar er þó það að segja að hann var dæmdur fyrir brot gegn lögum um ávana- og fíkniefni árið 2009. Þar var hann einnig sviptur ökuréttindum ævilangt en amfetamín, kókaín og kannabisefni fundust í blóðsýni sem tekin voru úr honum.

Hér má aftur á móti nálgast undirskriftarsíðuna.