Fagna launahækkun forstjórans

Stjórn BHM telur nýlega launahækkun forstjóra LSH staðfesta að laun háskólamenntaðra sérfræðinga hjá ríkinu standast ekki samanburð, hvorki við sambærileg störf á almennum vinnumarkaði né þegar horft er til nágrannalanda. Þetta segir í ályktun sem stjórnin sendi frá sér í morgun.

Stjórnin segir að samdráttur í ríkisrekstri undanfarin ár, fækkun starfsfólks, aukið álag og launafrystingar hafi dregið mjög úr aðdráttarafli ríkisins sem vinnustaðar fyrir háskólamenntaða sérfræðinga. Starfsfólk hafi sýnt gífurleg þolgæði við erfiðar aðstæður og ekki sé lengur hægt að ætlast til þess að verkefni og álag aukist en laun standi í stað eða lækki. „Því er það gleðiefni að velferðarráðherra hafi séð ástæðu til að launa sérstaklega þau verk sem hann taldi falla utan starfslýsingar forstjóra LSH. Dæmin um slíkt eru óteljandi og er stjórn BHM því fyllilega fylgjandi að vinnuframlagi umfram starfslýsingu sé mætt með aukagreiðslum," segir í yfirlýsingunni.

Stjórn BHM segist því fagna vilja stjórnvalda til að bæta launakjör sérfræðinga í opinberum störfum og færa þau nær því að vera samanburðarhæf og bendir um leið á að mikið verk sé enn óunnið til að svo megi verða. Stjórn BHM segist deila þeim ótta með velferðarráðherra að ella flytjist hæft vel menntað fólk í enn auknum mæli úr landi í leit að bættum kjörum.

Síðan segir í ályktuninni að í kjarasamningum BHM við ríkið frá árinu 2011 hafi aðilar sammælst um að endurskoða launakerfi háskólamenntaðra ríkisstarfsmanna í þeim tilgangi að gera ríkið að samkeppnishæfum og eftirsóknarverðum vinnustað. Sú vinna sé nú langt á eftir áætlun.