Stór hluti flugeldanna fór ekki á loft

Mannleg mistök urðu líklega til þess að flugeldasýningin á menningarnótt varð ekki eins vegleg og til stóð. „Ein röð af tívolíbombunum fór ekki á loft og fyrir vikið varð sýningin rosalega hæg í byrjun," segir Hilmar Már Aðalsteinsson, sem situr í stjórn Hjálparsveita skáta.

Bomburnar sem nota átti voru um 800 talsins en Hilmar telur að um hundrað þeirra hafi setið eftir. „Gámarnir sem skotið var af voru settir í geymslu yfir nótt og daginn eftir fengum við það staðfest að hluti flugeldanna fór ekki á loft," segir Hilmar Már. Hann telur að um mannleg mistök sé að ræða, mistök við tengingu eða tenging sem hafi hrokkið úr sambandi í flutningum.

Vodafone hefur greitt fyrir sýningarnar síðustu ár en Hilmar Már segir að hvorki fyrirtækið né gestir menningarnætur hafi fengið það sem til var ætlast. „Þessar sýningar eru rómaðar fyrir að vera flottar og skemmtilegar en því miður voru gerð mistök," segir Hilmar Már, sem leggur áherslu á að lokahluti sýningarinnar hafi verið stórglæsilegur.

„Það er svo samkomulagsatriði hvað við gerum í kjölfarið, hvort borgarbúar fái betri sýningu að ári eða hvað."