Búist við góðri gæsaveiði

Gæsaveiðitímabilið hófst í morgun og er búist við góðri veiði. Varp heiðargæsar og grágæsar gekk mjög vel í sumar og búast má við óvenju sterkum veiðistofnum.

Þetta kemur meðal annars fram á heimasíðu Skotveiðifélagsins, en talið er að liðlega fjögur þúsund manns stundi gæsaveiðar á haustin. Sú tala mun hafa staðið nokkurn veginn í stað í þónokkur ár. Blesgæsastofninn er enn á viðkvæmu stigi og eru veiðimenn hvattir til að kynna sér vel útlit hennar til þess að skjóta hana ekki í ógáti. Grágæsastofninn er talinn í góðu jafnvægi og heiðargæsastofninn er enn í vexti. Talið er að hann hafi allt að tífaldast á þremur áragtugum.

Helsingjaveiðar mega svo hefjast um mánaðamótin og er sá stofn líka talinn í góðu jafnvægi.- Það færist í vöxt að landeigendur leigi út veiðilendur og sagði gæsaveiðimaður í viðtali við Fréttastofu í morgun að menn ættu að hafa samband við landeigendur, áður en þeir hefja veiðar, til að ekki komi til árekstra.-