Frumvarp um flýtimeðferð gengislána naut aldrei stuðnings stjórnarliða

Frumvarp þingmanns Sjálfstæðisflokksins um flýtimeðferð gengislánamála fyrir dómstólum var þrívegis flutt en málið hlaut aldrei hljómgrunn meðal stjórnarþingmanna. Formaður flokksins segir að núverandi óvissuástand varðandi gengislánin fyrir dómstólum sé því heimatilbúinn vandi.

Helgi Hjörvar formaður efnahags- og viðskiptanefndar Alþingis sagði í kvöldfréttum okkar í gær að hann vildi skoða hvort hægt væri að breyta lögum þannig að endurkröfur skuldara á fjármálafyrirtæki fyrndust ekki.

Eins og fréttastofa hefur greint frá gætu 12-24 mánuðir verið í að óvissu vegna gengislánamála verði eytt en 11 prófmál voru höfðuð til að fá leyst úr flækjunni. Samkvæmt dekkstu sviðsmynd FME gætu bankarnir þurft að færa niður lán upp á 165 milljarða króna til viðbótar við það sem nú þegar hefur verið gert. Uppfært: Samkvæmt upplýsingum frá FME hafa bankarnir nú þegar fært niður 75 milljarða króna af þessum 165. Þetta eru því 90 milljarðar króna til viðbótar sem bankarnir gætu þurft að færa niður.

Sigurður Kári Kristjánsson lögmaður og fyrrverandi þingmaður flutti frumvarp árið 2010 um að bætt yrði við ákvæði í lög um meðferð einkamála um flýtimeðferð mála vegna gengistryggðra lána og verðtryggðra lána.

Bæði FME og Seðlabankinn skiluðu umsögnum við frumvarpið og gerðu ekki athugasemdir við þann málslið þess er snýr að gengislánum.

Frumvarpið var síðan endurflutt tvívegis, en fékk aldrei hljómgrunn meðal stjórnarþingmanna.

Bjarni Benediktsson, formaður Sjálfstæðisflokksins, segir á vefsíðu sinni á Facebook að stjórnarflokkarnir hafi aldrei sinnt frumvarpinu, heldur kæft það á hverju þinginu á eftir öðru. Óvissan um stöðu gengistryggðra lána sé því ekkert annað en „heimatilbúinn vandi."

Sigurð Kára grunar að frumvarpið hafi ekki notið stuðnings því það hafi komið úr vitlausri átt.

„Ég fékk aldrei neinar útskýringar á því. Þegar málið var lagt fram varð ég ekki var við að neinn sem lét sig málið varða setti sig upp á móti því að veita þessum málum flýtimeðferð í dómskerfinu, en mig grunar að ástæðan hafi verið sú að frumvarpið var lagt fram af þáverandi þingmanni stjórnarandstöðu og vegna þess hafi það ekki verið samþykkt og afgreitt, eins sorglegt og það er," segir Sigurður Kári í samtali við fréttastofu.

Hann segist í engum vafa um að önnur staða væri uppi ef frumvarpið hefði verið afgreitt.

Í umsögn Dómstólaráðs um frumvarpið, sem ekki er að finna á vef þingsins, en fréttastofa hefur undir höndum, kemur fram það mat formanns dómstólaráðs, Símons Sigvaldasonar, að hægt sé að ná sama markmiði með samþykki lögmanna undir rekstri máls. Í kjölfar hrunsins hafi verið rekin prófmál um mikilvæg úrlausnarefni og með samþykki lögmanna hafi allir frestir verið styttir frá því sem nú er. Þá hafi dómstjórar tekið mikilvæg mál fram fyrir og látið flytja þau strax.

Eins og að framan greinir gætu 12-24 mánuðir verið í að það takist að greiða úr flækjunni varðandi uppgjör gengistryggðra lána. Málshraðinn hefur því ekki verið meiri en raun ber vitni. thorbjorn@stod2.is