Skólavörur nemenda í fyrsta bekk kosta hátt í átta þúsund krónur

Skólavörur fyrir nemanda í fyrsta bekk í grunnskóla í Reykjavík kosta hátt í átta þúsund krónur. Kaupmaður í ritfangaversluninni Úlfarsfell, sem selt hefur tilbúna skólapakka til grunnskólanema í fimmtán ár, segir verðið hafi hækkað eftir hrun en innihald pakkanna breytist lítið.

Grunnskólar landsins hófust í dag og hafa því nemendur sótt ritfangaverslanir af krafti undanfarna daga til að kaupa allt sem þarf í skólatöskuna.

„Það er búið að vera alveg fullt að gera alveg frá því á mánudagsmorguninn og er ennþá," segir Jón Stefán Karlsson, eigandi Úlfarfells.

Í Úlfarsfelli geta nemendur í Melaskóla og Grandaskóla keypt tilbúna poka með skóladóti vetrarins

„Við förum eftir listanum sem kennararnir gefa út og tínum til það sem allir þurfa að kaupa og svo er oft eitthvað sem þau bæta við eins og litir og skæri og ýmislegt."

Hann segir foreldra kunna vel að meta pakkana sem hafa lítið breyst á þeim fimmtán árum sem þau hafa boðið uppá þá.

„Náttúrulega eftir hrun hafa orðið einhverjar hækkanir vegna gengisbreytinga, en hlutirnir hafa verið svipaðir síðastliðin tíu ár. Þá voru kannski ódýrustu pakkarnir á 1500-1600 en nú er ódýrasti pakkinn yfir 2000 kr og alveg upp í 6 þúsund."

Listarnir eru mismunandi eins og skólarnir eru margir en á lista hjá einum fyrsta bekk í grunnskóla í Reykjavík má meðal annars finna stílabækur, plastmöppur, hin ýmsu ritföng, svona plastpoka og svo liti, skæri og yddara en allt þetta kostar 7805 krónur og þá á eftir að kaupa skólatösku og pennaveski.