Laugalandsskógur verður opinn skógur

Frú Vigdís Finnbogadóttir mun opna Laugalandsskóg sem „Opin skóg" sunnudaginn 26. ágúst næstkomandi. Markmið verkefnisins er að opna skógræktarsvæði við alfaraleiðir, sem eru í umsjón skógræktarfélaga.

Opinn skógur er samstarfsverkefni skógræktarfélaga, Arionbanka og Skeljungs. Áhersla er lögð á að aðstaða og aðgengi verði til fyrirmyndar og á að miðla upplýsingum og fræðslu um lífríki, náttúru og sögu, svo að almenningur geti nýtt sér Opinn skóg til áningar, útivistar og heilsubótar.

Laugalandsskógur er þrettándi skógurinn sem gerður er að opnum skógi. Skilyrði til skógræktar þykja afar góð á Laugalandi eins og annars staðar á Þelamörk. Lerki hefur dafnar þar vel og sömu sögu er að segja um stafafuru sem mikið hefur verið gróðursett af á Laugalandi.

Styrktaraðilar verkefnisins munu flytja ávörp á sunnudaginn ásamt Magnúsi Gunnarssyni, formanni Skógræktarfélags Íslands, Guðmundi Sigvaldasyni, sveitarstjóra Hörgárbyggðar og Tómasi Inga Olrich, fyrrverandi menntamálaráðherra.