Þingflokkur fundar um breytingar á ráðuneytum í fyrramálið

Þingflokkur Samfylkingarinnar hittist klukkan hálf níu í fyrramálið á Hótel Natura, áður hótel Loftleiðir. Þingflokksformaður Samfylkingarinnar, Magnús Orri Schram, segir að þar verði rætt um breytingar á skipan ríkisstjórnarinnar. Til stendur að fækka ráðuneytum úr tíu í átta.

Flokksstjórnarfundur Samfylkingarinnar hefst síðan klukkan tíu um morguninn með ræðu Jóhönnu Sigurðardóttur forsætisráðherra. En fyrsta mál á dagskrá eru einmitt umræður og afgreiðsla á tillögu formanns um breytingar á ráðherraskipan.