Ölvaður ökumaður velti bíl og slasaðist

Bílvelta varð um miðnætti í gær á Skeiðavegi við bæinn Bitru. Ungur ökumaður missti stjórn á bifreið sem fór fjórar veltur áður en hún stöðvaðist. Ökumaður var ásamt þremur farþegum í bílnum. Allir sluppu án stórfelldra áverka og voru komnir út úr bílnum þegar lögreglu bar að garði. Þeir voru þó sendir til aðhlynningar á slysadeild í Reykjavík.

Önnur bílvelta varð á Hellisheiði í gærkvöldi. Ökumaður er grunaður um akstur undir áhrifum áfengis og vímuefna. Hann var einn í bílnum og slasaðist töluvert í veltunni. Ökumaður var fluttur á sjúkrahús í Reykjavík og lagður inn en bíllinn gereyðilagðist.

Um tvö leytið í nótt hafði svo lögreglan á Selfossi afskipti af þriðja ökumanninum sem grunaður var um akstur undir áhrifum vímuefna.