Skipuleggjendur Menningarnætur í skýjunum

Verkefnastjóri menningarnætur er í skýjunum eftir gærkvöldið og segir allt hafa gengið að óskum. Það hafi hjálpað til að fólk mætti snemma í bæinn og hafi verið til fyrirmyndar.

Dagskrá Menningarnætur lauk með flugeldasýningu við hafnarbakkann í Reykjavík klukkan ellefu í gærkvöldi. Að mati lögreglunnar á höfuðborgarsvæðinu var gestafjöldi Menningarætur ekki minni en síðustu ár og talið að um áttatíu þúsund manns hafi sótt hátíðina. Guðmundur Birgir Halldórsson verkefnastjóri Menningarnætur segir allt hafa gengið að óskum.

„þetta er nú í fyrsta sem að ég kem nálægt þessarri skipulagningu þannig maður var svolítið stressaður fyrir en núna er ég rosalega ánægður og fannst bara takast mjög vel til og allir sem ég hef talað við eru sammála því að hún hafi tekist mjög vel í ár þannig ég er bara í skýjunum," segir Guðmundur Birgir.

Hann segist hafa farið á fund með öryggisaðilum eftir dagskrá hátíðarinnar í gærkvöldi og þeir hafi einnig verið ánægðir með kvöldið.

„Og kannski það sem þeir tóku til sem ástæða var að fólk er farið að taka vel í það að koma labbandi og taka strætó og þá verður allt auðveldara og það virkar vel," segir Guðmundur.

Þá fannst Guðmundi fólk mæta snemma í bæinn enda dagskrá þétt frá hádegi og fram á kvöld, það hafi einnig hjálpað til. „Þetta er farið að nýtast meira sem heill dagur, sem að ég er mjög ánægður með," segir Guðmundur að lokum.