Þrír ferðamenn slasaðir eftir bílslys

Þrír menn voru fluttir með sjúkraflugi til Reykjavíkur eftir bílslys í Finnafirði á sjötta tímanum í dag. Einn þeirra er talinn alvarlega slasaður en að sögn vakthafandi læknis á slysavarðstofu Landspítalans er hann ekki í lífshættu.

Mennirnir eru kínverskir ferðamenn og voru fimm saman í bíl í norðanverðum Finnafirði þegar ökumaður missti stjórn á bílnum með þeim afleiðingum að hann endasnerist. Bíllinn gereyðilagðist og þrír mannanna slösuðust. Tveir þeirra sluppu nokkuð vel.

Ástæður slyssins voru að öllum líkindum þær að þarna voru óvanir ökumenn á ferð á erfiðum malarvegum.