Tökur á Oblivion samkvæmt áætlun

Þótt erlendir fjölmiðlar fullyrði að Tom Cruise sé niðurbrotinn maður eftir að fréttir bárust í gær af skilnaði hans og leikkonunnar Katie Holmes er leikarinn enn staddur á Íslandi við tökur á myndinni Oblivion eftir því sem Vísir kemst næst.

Í erlendum fjölmiðlum hafa verið sagðar óljósar fréttir af því að Cruise hafi farið af landi brott, en til stóð að hann yrði hér að minnsta kosti fram í næstu viku og fagnaði afmæli sínu, sem er 3. júlí, hér.

Hvorki Leifur Dagfinnsson hjá kvikmyndaframleiðslufyrirtækinu True North né Claire Raskind, upplýsingafulltrúi tökuliðs myndarinnar Oblivion, vildu tjá sig um málið. „Við erum í tökum núna," sagði hún. Aðspurð sagði hún að tökurnar í kvöld færu fram samkvæmt fyrirhugaðri dagskrá.