Reykvíkingur ársins dauðkveið laxveiðinni

„Ég dauðkveið fyrir þessu því ég hef aldrei veitt annað en marhnút sem krakki," segir Theodóra Rafnsdóttir, sem var valin Reykvíkingur ársins og fékk fyrir vikið að opna Elliðaárnar í sumar.

Theodóra er greinilega fiskin mjög því nú er hún komin heim með eina tvo laxa eftir þennan fyrsta veiðitúr. „Þetta var mjög skemmtilegt, segir hún og býst helst við að snúa sér meira að laxveiðum en áður hér eftir.

Theodóra var komin út í á klukkan sjö í morgun og naut góðrar aðstoðar Ásgeirs Heiðars við að setja í maríulaxinn. Nú um tíu leytið var hún á spretti á leið í vinnuna. Hún býst ekki við að hafa orku til að grilla fenginn strax í kvöld eftir þennan ævintýralega dag. Það verður vegleg grillveisla einhverntíma næstu daga í staðinn.