Fimmfaldur ræðukóngur segist sístur í málþófi

Pétur H. Blöndal, þingmaður Sjálfstæðisflokksins, landaði titlinum ræðukóngur Alþingis í 5. sinn í röð þetta árið. Pétur talaði samtals í tæplega 33 klukkustundir og bætir þar með tímann sinn frá því í fyrra sem var 31 klukkustund og þrjú korter.

Að eigin sögn talar Pétur svona mikið því hann hefur áhuga og skoðun á svo mörgum málum. „Fyrst og fremst vil ég breyta mörgu og benda á glappaskot á Alþingi," segir hann. Hann segist líka sérlega duglegur að sitja fundi Alþingis.

Pétur þvertekur fyrir að ræður hans séu málþóf hugsaðar til að koma í veg fyrir framgang mála. „Ég held að ég sé sístur í málþófi, því þegar er talað um málþóf þá er átt við endurtekningar eða innihaldslaust bull. Ég held að allar mínar ræður séu nokkuð innihaldsríkar, þó ég segi sjálfur frá," segir Pétur og bendir auk þess á að meðalræðutími hans sé fremur stuttur.

Næstur á eftir Pétri kemur Gunnar Bragi Sveinsson, þingmaður Framsóknarflokks, og talaði tæpum þremur klukkustundum og fjörtíu mínútum minna en Pétur. Guðlaugur Þór Þórðarson, þingmaður Sjálfstæðisflokks var þriðji, Vigdís Hauksdóttir, þingmaður framsóknar í fjórða sæti og loks Birgir Ármannsson í Sjálfsstæðisflokknum í fimmta sæti.

Þingmenn stjórnarandstöðunnar tala iðulega meira en stjórnarþingmenn. Til að mynda hampaði Steingrímur J. Sigfússon titlinum ræðukóngur Alþingis áður en hann settist í ríkisstjórn.