Herferð Greenpeace gæti beinst gegn Drekasvæðinu

Alþjóðleg barátta Greenpeace gegn olíuleit á Norðurslóðum gæti beinst gegn áformum Íslendinga á Drekasvæðinu. Í frétt á Vísi í gær kom fram að Bítillinn Paul McCartney er í hópi heimsfrægra stjarna sem ætla að styðja herferð Grænfriðunga.

Svæðið sem íslensk stjórnvöld hafa boðið út á Jan Mayen-hryggnum til olíuleitar og vinnslu er allt norðan heimsskautsbaugs og telst því hluti af Norðurslóðum, eins og þær eru almennt skilgreindar. Heimsskautsbaugur liggur nú í kringum 66,3 gráður norðlægrar breiddar en Drekasvæðið er allt norðan 67. breiddargráðu.

Barátta Greenpeace gegn olíuleit á Norðurslóðum takmarkast þó ekki við heimsskautsbauginn og er skemmst að minnast þess að samtökin sendu skip í fyrra til vesturstrandar Grænlands til að hindra olíuboranir skoska olíufélagsins Cairn. Þær fóru fram á 64. breiddargráðu, á hafsvæði norðvestur af Nuuk, en Reykjavík liggur á sömu breiddargráðu.

Grænlendingar sökuðu Greenpeace þá um tvískinnungshátt og sögðu að samtökin hefðu ekkert aðhafst vegna olíuborana Norðmanna í Barentshafi.

Norsku umhverfissamtökin Bellona hafa þegar lýst yfir andstöðu við olíuleit við Jan Mayen. Þegar norsk stjórnvöld tilkynntu um áform sín þar fyrir þremur árum sagði talsmaður Bellona þau vera hneyksli og boðaði alþjóðlega baráttu gegn olíuvinnslu þar.

Hérlendis hafa einnig birst efasemdir um olíuleit á Drekasvæðinu. Þannig hefur landsfundur Vinstri grænna ályktað um að Ísland eigi að beita sér fyrir friðlýsingu Norðurheimsskautssvæðisins. Hjörleifur Guttormsson, helsti hugmyndafræðingur flokksins í umhverfismálum, túlkaði þá samþykkt fyrir þremur árum svo hún tæki einnig til Drekasvæðisins.

Þingmenn Vinstri grænna hafa hins vegar í atkvæðagreiðslum á þessu kjörtímabili vegna þingmála til undirbúnings olíuvinnslu þar sýnt í verki að þeir leggjast ekki gegn þeim áformum.