Samþykktu að vinna að friðlýsingu Drekasvæðis og norðurslóða

Þremur dögum fyrir kosningar afneitaði forysta Vinstri grænna skoðun Kolbrúnar Halldórsdóttur á olíuvinnslu. Formaður flokksins, Steingrímur J. Sigfússon, sagði umhverfisstefnu VG ekki útiloka það að Ísland yrði aðili að olíuvinnslu, frekar en aðrar þjóðir.

Olíuvinnsla á Drekasvæðinu rýmar hins vegar ekki við framtíðarsýn Hjörleifs Guttomssonar, fyrrverandi ráðherra og alþingismanns. Hjörleifur segir að undir Norðurskautssvæðinu, - og Jan Mayen-svæðið og svæðið norður af Noregi séu hluti af því, - sé áætlað að sé rösklega fimmtungur af þeim forða sem eftir er af jarðefnaeldsneyti, olíu. Ef þetta verði notað og brennt á næstu áratugum standi menn ekki við þau markmið að stöðva sig af við hlýnun andrúmsloftsins um tvær gráður.

Hann vill að íslensk stjórnvöld beiti sér mjög ákveðið fyrir því að þjóðir heims bremsi af olíuvinnslu á norðurslóðum, og ekki verði farið út í kapphlaup um olíuvinnslu á þessu stóra svæði, heldur ná utan um það og friðlýsa það gagnvart slíkri nýtingu.

En hefur þá Kolbrún Halldórsdóttir rétt fyrir sér þegar hún segir olíuvinnslu á Drekasvæðinu ekki samrýmast stefnu Vinstri grænna?

"Ég sé ekki betur en að hún tali í sama anda eins og samþykktir á landsfundinum okkar fyrir ekki löngu síðan, í marsmánuði," svarar Hjörleifur. Þar hafi verið lagðar þær línur að Vinstrihreyfingin grænt framboð beiti sér fyrir því að færa umræðuna um friðlýsingu þessa svæðis inn í alþjóðaumræðuna og beiti sér fyrir því að reyna að ná þar samkomulagi. Það sé eftir því spori sem menn eigi að vinna, segir Hjörleifur.

Í ályktun Landsfundar VG um Norðurslóðir segir meðal annars:

"Landsfundur VG telur að Ísland eigi að beita sér fyrir umræðu allra hlutaðeigandi ríkja um friðlýsingu Norðurheimsskautssvæðisins."

Spurður hvort að með Norðurskautssvæði sé hann einnig að tala um Drekasvæðið svarar Hjörleifur:

"Já, mikil ósköp. Það er auðvitað hluti af því. Og allt sem norðar er og allt í kringum heimsskautsbauginn og innan hans, sem þarna er um að ræða."