Hreystimenni hlaupa aftur og aftur upp Esjuna

Á morgun munu hátt í níutíu ofurhugar hlaupa upp og niður Esjuna, aftur og aftur allt að tíu sinnum. Hlaupið nefnist Mt.Esja Ultra og er það fyrsta sinnar tegundar á Íslandi hvað varðar erfiðleikastig, hækkun og vegalengd.

„Það er ótrúlegt að 89 manns skrái sig viljugir í að fara oftar en einu sinni á Esjuna," segir Elísabet Margeirsdóttir, verðurkona.

Elísabet telur verðurspána fyrir morgundaginn líta vel út. „Þetta er einmitt veðrið sem við báðum um," segir hún en á morgun er útlit fyrir hæga vestlæga átt og 16 - 18°C hitastig. Léttskýjað verður og hætt við stöku skúrum. „Ég held að fólk verði bara ánægt með smá kælingu í skúraformi eftir margra klukkutíma hlaup."

Hlaupið verður fram og aftur upp að Steini og niður. Þátttakendur geta valið um þrjár vegalengdir: 2 ferðir upp að Steini, samtals 14 km og 1200m í hækkun, 5 ferðir upp að Steini sem telja 35 km og 3000m hækkun og þeir allra hörðustu fara 10 ferðir upp að Steini sem eru 70 km og 6000m hækkun. Fyrstu menn verða ræstir klukkan fimm í fyrramálið.

Fjórir menn munu hlaupa 10 ferðir og tugir manna leggja í hinar vegalengdirnar. Skráningu í hlaupið er lokið en Björn Margeirsson, langhlaupari, var síðastur til að skrá sig og hleypur 2 ferðir á morgun.

Skipuleggjendur hvetja sem flesta að koma við og fylgjast með. Gert er ráð fyrir að mesta stemmningin verði um þrjú leytið við Esjustofu þegar fyrstu menn koma í mark. „Þetta verður mögulega sögulegt," segir Elísabet, enda er þetta eitt erfiðasta hóphlaup sem hlaupið hefur verið á Íslandi.