Erill hjá björgunarsveitum

Sjúkraflutningamenn og björgunarsveitarmenn komu í gærkvöldi ungum manni til hjálpar í hlíðum Esjunnar, sem hafði veikst skyndilega rétt við svonefndan Stein. Þeir báru manninn niður og fluttu hann á Landsspítalann.

Björgunarsveitarmenn frá Grundarfirði sóttu konu í hlíðar Kirkjufells undir kvöld, en hún hafði snúið sig á ökkla og komst ekki niður af sjálfsdáðum.

Björgunarsveitir frá Hellu og Hvolsvelli voru einnig kallaðar út til að leita að tveimur konum, sem höfðu villst í þoku á Fimmvörðuhálsi, en þær komu fram í Baldvinsskála skömmu síðar, heilar á húfi.