Mun stinga upp á þjóðaratkvæðagreiðslu í þriðja sinn

Ólína Þorvarðardóttir, þingmaður Samfylkingarinnar, mun í haust leggja til að haldin verði þjóðaratkvæðagreiðsla um framtíðarskipan fiskveiðistjórnar Íslands. Ólína skrifar grein í Fréttablaðið í dag um málið en hún hefur tvisvar lagt fram slíka tillögu áður. Í bæði skiptin dagaði hún uppi í þinginu.

„Nú eru menn komnir í miklar ógöngur með fiskveiðistjórnunarfrumvarpið og allt stefnir í að stjórnin ætli að teygja sig í átt til stjórnarandstöðunnar með málið. Svo úr því sem komið er þá tel ég að menn eigi að staldra við og sækja frekar efnivið til þjóðarinnar til að vinna frumvarpið áfram," segir Ólína í samtali við fréttastofu.

Ólína getur ekki sagt nákvæmlega fyrir um hvenær slík atkvæðagreiðsla færi fram. Það verður þó í fyrsta lagi í desember og þá aðeins ef þingsályktunartillaga Ólínu verður fljótt samþykkt.

Ef þjóðaratkvæðagreiðsla af þessum toga færi fram yrði hún ráðgefandi. Ólína telur rétt að fagaðilar myndu móta spurningar fyrir atkvæðagreiðsluna. Henni fyndist þó rétt að spyrja um afstöðu fólks til opins markaðar með aflaheimildir, til tímabundinna nýtingaleyfa og til strandveiða og handfæraveiða.