Dæmdir fyrir líkamsárás á Selfossi

Þrír menn voru dæmdir fyrir líkamsárás í Héraðsdómi Suðurlands í dag. Tveir þeirra fengu 30 daga skilorðsbundið fangelsi en einn 45 daga, einnig skilorðsbundið.

Árásin átti sér stað 10. apríl árið 2011 á bílastæði við verslun N1 á Selfossi eftir dansleik. Mönnunum var gefið að sök að hafa í sameiningu gengið í skrokk á fórnarlambinu og sparkað ítrekað í hann liggjandi svo hann handleggsbrotnaði og marðist.

Aðdragandi átakanna var sá að árásarmennirnir kölluðu á eftir fórnarlambinu „hommi" eða eitthvað í þá veru. Fórnarlambið sneri sér þá ógnandi að árásarmönnunum og spurði hver hefði kallað. Árásarmennirnir sneru þá vörn í sókn og lömdu fórnarlambið all-rækilega.

Ákært var fyrir brot gegn 1. mgr. 218. gr. almennra hegningarlaga sem lýsir stórfelldri líkamsárás. Dómurinn komst að þeirri niðurstöðu að brotið varðaði við 217. gr. laganna, sem lýsir minni háttar líkamsárás. Ástæðan var sú að ekki þótti sannað að árásin hefði valdið handleggsbrotinu heldur hefði höndin brotnað þegar fórnarlambið datt um kant á bílastæðinu.

Fjórði maðurinn var sýknaður þar sem ekki þótti sannað að hann hefði tekið þátt í árásinni.

Árásarmennirnir voru dæmdir til að greiða brotaþola 150.000 kr. í miskabætur.