Ótrúlegur bati eftir að hafa fengið spjót í gegnum höfuðið

Sextán ára gamall piltur í Miami í Bandaríkjunum liggur nú á gjörgæslu. Drengurinn varð fyrir slysaskoti úr skutulbyssu með þeim afleiðingum að tæplega meters langt spjót skaust í gegnum höfuð hans.

Atvikið átti sér stað þegar Yasser Lopez var að leika við félaga sinn. Vinurinn hlóð skutulbyssu sem þeir fundu og við það skaust spjótið í höfuð Yassers.

Drengurinn var við dauðans dyr þegar sjúkraliðar komu á vettvang. Það þótti þó með ólíkindum að Yasser gat tjáð sig, þrátt fyrir spjótið sæti fast í höfði hans.

Hann sagði sjúkraflutningamönnunum að hann fyndi lítið sem ekkert til. Hann kvartaði þó yfir doða í vinstri hlið sinni.

Aðeins munaði nokkrum sentímetrum að spjótið hefði farið í auga Yassers.

Spjótið hefur nú verið fjarlægð. Samkvæmt skurðlæknum í Miami heilsast Yasser nokkuð vel. Hann kemur þó til með að þurfa að dvelja á spítala næstu mánuði. Löng endurhæfing bíður hans að því loknu.

Hægt er að lesa nánar um málið á vefsíðu CBS Miami.