Borgarfulltrúi vill meta betur hættuna af hraunflóði

Huga þarf betur að líkum á eldsumbrotum í nágrenni höfuðborgarsvæðisins og hraunsflóðs af völdum þeirra. Þetta segir Kjartan Magnússon, borgarfulltrúi Sjálfstæðismanna. Hann segir gagnrýni eldfjallasérfræðings á áhættumati Almannavarna réttmæta.

Almannavarnir huga ekki nægilega að hættunni sem steðjar að höfuðborgarsvæðinu þegar eldsumbrot verða næst á Reykjanessvæðinu og yfirvöld hafa leyft byggingar á stöðum sem ekki ætti að byggja á. Þetta kom fram í máli Haraldar Sigurðssonar, eins helsta eldfjallasérfræðings heims, í fréttum okkar í gær.

Sagði Haraldur undarlegt að í nýlegri 65 síðna skýrslu Almannavarna um áhættumat á höfuðborgarsvæðinu sé eldvirkni sé mjög lítið til umfjöllunar eða aðeins á hálfri blaðsíðu.

Kjartan Magnússon, borgarfulltrúi Sjálfstæðismanna, segir gagnrýni Haraldar réttmæta. Líkurnar á eldsumbrotum séu mjög litlar en þeim verði að gefa gaum.

„Ég held að þessi gagnrýni sé réttmæt. Þegar skýrslan var lögð fram í borgarráði á sínum tíma vakti það athygli að það var ekki löng umfjöllun um hugsanlega hættu eða tjón sem eldsumbrot í nágrenni Reykjavíkur gæti valdið," segir hann.

„Mér fannst þegar þessi skýrsla kom út að það hefði hefði átt að fjalla meira um líkurnar á eldsumbrotum í nágrenni Reykjavíkur. Þess vegna óskuðum við borgarráðsfulltrúar Sjálfstæðisflokks eftir því að frekari vinna færi fram og ég veit ekki betur en verið sé að vinna að því núna," segir Kjartan.

Haraldur Sigurðsson, segir að endurskoða þurfi starf Almannavarna hvað þetta varðar. Þá sé mikilvægt að Almannavarnir fái til liðs við sig jarðfræðing eða jarðeðlisfræðing við gerð áhættumats.

„Aftur á móti eru þarna leikskólakennarar og rithöfundar og fólk sem kannski ber ekki skyn á áhættuna og áhættumat, sem er viss vísindagrein. Það er engin vafi að það er áhætta á höfuðborgarsvæðinu hvað eldvirkni varðar, það er alveg klárt," segir hann.

Haraldur segist ekki vilja hræða fólk, hraunrennsli sé yfirleitt ekki lífshættulegt. Fólk þurfi hins vegar að vera betur upplýst um stöðuna og huga þurfi betur að henni við skipulag byggðar.