Affallsvatn frá jarðhitavirkjunum nýtt til sköpunar

Kynningarfundur um möguleika á nýtingu á affallsvatni frá virkjunum við Mývatn verður haldinn í Reykjahlíðarskóla í Mývatnssveit kl. 2 næsta föstudag.

Um er að ræða heitt vatn sem nú rennur frá jarðhitavirkjunum, niður í Mývatn og er jafnvel að skaða náttúruna. „Þetta eru náttúrlega bara peningar sem flæða frá okkur," segir Dagbjört Bjarnadóttir, oddviti Skútustaðahrepps. Nú stendur til að fá aðgang að þessu vatni og kanna hvernig hægt er að nýta það til að búa til afurð, t.d. rækta þörunga.

Enn er ekki ákveðið hvers kyns afurð verður framleidd, en möguleikarnir eru margir og spennandi. „Við getum búið til fæðubótarefni, litarefni, eldsneyti, áburð," segir Dagbjört. „Við þurfum bara að kanna hvað skaðar ekki umhverfið og hvaða afurð við gætum selt."

Næsta skref verður að fá sérfræðing til fræðilegrar rannsóknar- og undirbúningsvinnu. Skoðuð verður ræktun smáþörunga, hvernig hægt er að skima þá og hvað gæti orðið hugsanleg framleiðsluvara. Sérfræðingurinn mun byrja í október og hefur sex mánuði til stefnu. Eftir þann tíma mun liggja fyrir hvað verður gert. „Þá get ég svarað spurningunum sem eru spennandi, eins og hvað ætlum við nákvæmlega að gera?" segir Dagbjört.

Á fundinum næsta föstudag verður hugmyndin kynnt og fjallað um meginstoðir sem vinnan mun byggja á. Dagskrá fundarins verður sem hér segir:

Dagbjört Bjarnadóttir segir frá tilurð og aðdraganda verkefnisins.

Hjörleifur Einarsson, deildarformaður auðlindadeildar Háskólans á Akureyri, tækifæri og möguleg starfsemi.

Logi Már Einarsson, arkitekt, mun gefa fólki hugmynd um útlitslega þætti verkefnisins.

Sigurður Steingrímsson, verkefnastjóri hjá Nýsköpunarmiðstöð, segir frá stöðunni í dag og framtíðarsýn.