Helmingurinn fær sumarstarf hjá borginni

Rúmlega 50% þeirra ungmenna sem sóttu um sumarstarf hjá Reykjavíkurborg fá vinnu í ár. Þetta segir Hulda Gunnarsdóttir, sérfræðingur upplýsingamála hjá borginni.

Áætlað er að ráða um 1400 starfsmenn í sumar-og afleysingastörf hjá borginni 2012. Rúmlega 4000 umsóknir hafa borist.

Allir 15 og 16 ára nemendur fá starf hjá Vinnuskóla Reykjavíkur ef þeir sækja um. Það eru 1450 skráðir í skólann í dag.

Samtals fá því 2850 ungmenni starf hjá Reykjavíkurborg í sumar. Umsóknir voru rúmlega 5450, þegar umsóknir um Vinnuskólann eru teknar með. Allt í allt verður því rúmur helmingur ráðinn.

Ráðningaraðilar eru að ganga frá ráðningum þessa dagana og ætti öllum umsækjendum að hafa borist svar um miðjan júní.

Greint var frá því fyrr í dag að öll ungmenni sem sóttu um sumarstarf hjá Kópavogi fengu ráðningu. Það voru alls rúmlega 1.500 ungmenni.