Þrír Íslendingar slógu í gegn í karókí í Berlín

Þó svo Íslendingar hafi ekki riði feitum hesti frá Euorvison keppninni í ár þá voru þrír dularfullir Íslendingar sem héldu uppi söngheiðri lands og þjóðar í Þýskalandi í gær. Þannig má finna þetta myndband á Youtube af þremur íslenskum strákum sem syngja sívinsælan slagara eftir kónginn sjálfann, Elvis Presley.

Í meðfylgjandi myndbandi má sjá félagana taka þátt í fyrirbærinu bearpit karaoke. Það er haldið í Mauerpark í Berlin en á hverjum sunnudegi mæta þrjátíu til fimmtíu þúsund manns til þess að hlýða á áhugasöngvara spreyta sig í karókí.

Félagarnir þrír slá hreinlega í gegn með flutningi sínum eins og sjá má á myndbandinu og fagnar fólk ítrekað á meðan þeir syngja lagið. Að lokum eru þeir beðnir um að taka annað, sem þeir afþakka þó pent.

Karókí fyrirbærið í almenningsgarðinum er athyglisvert. Þannig skrifar breska blaðið Guardian um málið á heimasíðu sinni. Þar kemur í ljós að það voru nokkrir félagar frá Dublin í Írlandi sem byrjuðu á þessu. Þeir hjóluðu um Berlín árið 2009 og voru þá ávallt með fartölvu ásamt hátölurum og hljóðnema í farteskinu. Þeir reyndu síðan að fá fólk til þess að syngja karókí lög á götum úti.

Eitt síðdegið ákváðu þeir að koma við í garðinum til þess að athuga hvort það væri einhver áhugi fyrir uppátækinu. Á innan við mánuði voru þúsundir farnir að mæta á svæðið til þess að hlýða á áhugasöngvara.

Þessi undarlega saga gæti þó brátt verið á enda, því borgaryfirvöld í Berlín hafa tekið eftir uppákomunni. Þannig þarf sérstakt leyfi til þess að halda karókí-viðburði, ef svo má kalla. Nú kostar það félagana sem standa á bak við tónleikahaldið 1500 evrur að leyfa fólki að syngja karókí fyrir gesti og gangandi, eða um 250 þúsund krónur, auk þess sem þeir mega aðeins halda 12 slíka tónleika á fyrirfram ákveðnum dögum yfir sumarið.

En hvernig sem sú deila fer, þá mega Íslendingarnir eiga það, að þeir koma sínu ágætlega til skila. Hafi einhver upplýsingar um það hverjir íslensku söngvararnir eru þá mega þeir að sjálfsögðu senda okkur línu á frettir@stod2.is.