Stolið málverk metið á milljarða kom í leitirnar

Afar verðmætt málverk eftir franska málarann Cezanne fannst í Serbíu á dögunum. Málverkinu, sem heitir drengurinn í rauða vestinu, var stolið af safni í svissnesku borginni Zurich árið 2008. Verkið er metið á 109 milljónir dollara eða tæpa fjórtán milljarða íslenskra króna.

Á sínum tíma var um eitt mesta listaverkarán í sögunni að ræða en þrír grímuklæddir menn ruddust inn á safnið og stálu nokkrum meistaraverkum. Fyrir utan verk Cezanne hurfu meistaraverk eftir Claude Monet, Vincent van Gogh og Degas. Verk Van Goghs og Monets, fundust skömmu eftir ránið í Zurich en hin verkin tvö, drengurinn í rauða vestinu og verk Degas hurfu af yfirborði jarðar.

Á sínum tíma báru vitni að ráninu að mennirnir hefðu talað með slavneskum hreim. Það virðist hafa átt við rök að styðjast því verkið fannst í Belgrad í Serbíu eins og áður sagði. Þrír hafa verið handteknir vegna málsins en óljóst er hvort um sjálfa ræningjana sé að ræða.