Gengið frá sölu Iceland Foods til stjórnenda

Slitastjórn gamla Landsbankans, LBI, hefur gengið frá sölu á allri hlutabréfaeign Landsbanka Íslands hf. í verslunarkeðjunni Iceland Foods Limited til Oswestry Acquico Limited, sem er félag í eigu yfirstjórnenda Iceland Foods, að meðtöldum forstjóranum Malcolm Walker, og annarra fjárfesta.

Í tilkynningu frá slitastjórninni segir að söluverðið miðist við að heildarverðmæti Iceland Foods sé 1.550 milljónir sterlingspunda, eða rúmir 300 milljarðar íslenskra króna. Slitastjórnin átti um 67 prósent í keðjunni, slitastjórn Glitnis um 10 prósent og restina áttu stjórnendur hennar fyrir.

„Slitastjórn LBI telur söluna í fullu samræmi við markmið hennar um að hámarka virði eignarhluta bankans í félaginu og skila bestu mögulegu endurheimtum til kröfuhafa," segir ennfremur.